REPORT FROM REY TUTAS – MAY 06, 2015
May 7th, 2015 by Latest News
LOKAL NGA BALITA
MAYO 6, 2015
REYTUT’s
IPAHIGAYON SA SUNOD SEMANA ANG KATAPUSANG PAGSUSI SA ALBURQUERQUE CLUSTER SANITARY LANDFILL SA KAGAMHANANG LOKAL SA ALBUR, TOURISM INFRASTRACTURE ENTERPRISE AND ZONE AUTHORITY, BEMO UG DEPARTMENT OF ENVIRONMENT AND NATURAL RESOURCES
Gitakdang ipahigayon sa sunod semana ang katapusang pagsusi sa Alburquerque Cluster Sanitary Landfill nga nahimutang sa Barangay Dangay sa lungsod sa Albur.
Kini ang gibutyag ni Engr. Fe Culiao, Albur Municipal Engineer ug Head sa Municipal Inspectorate Team atul sa pakighinabi sa DYRD Balita.
Nasayran nga ang pagasusihon mao ang Phase 3 sa maong Landfill nga nagkantidad og kapin sa 55 milyones pesos nga nahimong kontrobersyal tungod sa matud pa daghang wala pa mahuman nga trabaho bisan og natapos na ang kontrata niadtong Abril 12 ning tuig.
Matud ni Engr. Culiao nga ang mga mohimo sa pag-inspeksyon mao ang representante gikan sa kagamhanang lokal sa Albur, ang implementing agency nga Tourism Infrastracture Enterprise and Zone Authority kon TIEZA, kontraktor nga Lourel Development Corporation, Department of Environment and Natural Resources, Bohol Environment and Management Office.
Dugang sa Municipal Engineer nga wala pa gyud sila kahibalo kung unsang petsaha gyud ipahigayon ang pag-inspeksyon kay wala pa pud silay nadawat nga opisyal nga komunikasyon gikan sa TIEZA.
Gilauman usab ni Mayor Efren Tungol nga moapil sa pagsusi ang Commission on Audit kon COA.
LOKAL NGA BALITA
MAYO 6, 2015
REYTUT’s
GISAWAY NI MAYOR ALLEN REY PIEZAS ANG NAHITABONG PAGBANHIG-PATAY SA BARANGAY KAPITAN SA AGUS DAKBAYAN SA LAPU-LAPU NGA SI JOVENCIO LAURON DIDTO SA CABOY, CLARIN UG NANAWAGAN SA KAPOLISAN NGA PASPASAN ANG IMBESTIGASYON ARON MAANGKON ANG HUSTISYA SA BANAY SA BIKTIMA
Gisaway ni Clarin Mayor Allen Rey Piezas ang nahitabong pagbanhig patay sa barangay kapitan sa Barangay Agus, dakbayan sa Lapu-Lapu nga si Jovencio Lauron niadtong Domingo sa buntag didto sa Barangay Caboy lungsod sa Clarin.
Gipahayag ni Mayor Piezas nga gihimo nila karon ang tanan aron maangkon sa banay sa biktima ang hustisya. Nanawagan usab ang mayor sa Clarin sa mga kapolisan nga paspasan ang ilang imbestigasyon ug palig-onon pa ang ilang mga intelligence network aron sa daling pagkasikop sa mga mamumuno sa maong opisyal sa barangay sa siyudad sa Lapu-Lapu.
Dihang nahinabi sa DYRD Balita,ang mayor sa Clarin niingon nga nagkinahanglan usab ang mga tinogyanan sa balaod sa pag-abag sa publiko pinaagi sa pagtaho aron dali nga masulbad ang maong krimen.
Ang biktima uban sa iyang pamilya ug paryente padulong sa lungsod sa Sagbayan gikan sa pantalan sa Clarin nagsakay og traysikol kay motambong unta pista ug sumad sa kamatayon sa iyang igsoon apan gibanhigan sa upat ka mga mamumuno nga pulos nagsul-ob og helmet ug nagtabon sa nawong paghidangat sa mingaw nga dapit sa Barangary Caboy.
Sumala sa buhatang rehiyonal sa kapolisan sa Rehiyon 7, posibleng politika ug bangi sa yuta ang hinungdan sa pagpatay kang Lauron nga nakadawat og hulga sa kamatayon sa wala pa mahitabo ang pagpatay.
LOKAL NGA BALITA
MAYO 6, 2015
REYTUT’s
GILAUMAN NGA MABUTANGAN NA OG DOPPLER RADAR SA DILI PA MOTAPOS NING TUIG ANG LALAWIGAN SA BOHOL ARON ADUNA NAY MOTINO SA NAHIMUTANGAN UG TULIN SA BAGYO, ULAN UG PANGANOD SUMALA NI PAG-ASA ADMINISTRATOR VIC MALANO
Gilauman nga sa dili pa matapos ning tuig mabutangan na og Doppler Radar ang lalawigan sa Bohol. Kini sumala pa ni Philippine Atmospheric Geophysical and Astronomical Services Administration Administrator Vicente”Vic”Malano nga usa ka bol-anon dihang eksklusibong nahinabi sa DYRD Balita.
Si Administrator Malano niingon nga sa PAG-ASA Doppler Network, usa ang lalawigan sa Bohol ug Siquijor sa Central Visayas ang gilantaw nila nga butangan og doppler radar apan sa pagkakaron ilaha pa kining gitun-an.
Ang Doppler Radar usa ka radar tracking system ginamit ang epekto sa Doppler aron sa pagtino sa nahimutangan ug tulin sa bagyo, panganod, ulan ug uban pa.
Kahinumdoman nga nangayo og tabang ang lokal nga buhatan sa PAG-ASA sa Bohol sa Provincial Development Council nga mabutangan sa maong kahimanan ang lalawigan.
Gitinguha karon sa PAG-ASA nga karong tuiga ma-ila na nila ang dapit nga butangan sa Doppler Radar.
Link back to: Live Radio Recorded Broadcast Hot Topics