REPORT FROM REY TUTAS – MARCH 31, 2015
Apr 1st, 2015 by Latest News
LOKAL NGA BALITA
MARSO 31, 2015
REYTUT’s
GITAKDANG IDUSO KARONG ADLAWA NGADTO SA NASUDNONG KAGAMHANAN ANG SIYAM KA MGA GILARAW’NG PROYEKTO SA BOHOL NGA GILAUMANG MALAKIP SA SUNOD TUIG NGA NASUDNONG BUDGET
Gitakdang iduso karong adlawa sa mga kadagkuan sa Regional Development Council sa Central Visayas nga gipangulohan ni Gobernador Edgar Chatto ngadto sa nasudnong kagamhanan ang siyam ka mga gilaraw’ng proyekto sa Bohol nga gilaumang malakip sa sunod tuig nga nasudnong budget.
Gibutyag ni Provincial Administrator Alfonso Damalerio II nga ang mga proyekto nga tukion didto sa kaulohan aron malakip sa 2016 General Appropriations Act mao ang bag-ong Hall of Justice, proyekto para sa Bohol Island State University, 50 ka ektaryang luna sa lungsod sa Ubay nga maoy gisugyot nga tukoran sa kaugalingong tinubdan sa kuryente sa probinsiya, Philippine Coconut Authority Building, Bohol Tourism Center for Culture and Arts, Tourism Road sa Loon nga gitawag og Loon Uplifted Intertidal Zone kon LUIZ.
Lakip usab nga hisgutan sa Regional Development Council-7 nga gipangulohan ni Gobernador Chatto isip tsirman uban sa National Economic Development Authority kon NEDA, Department of Budget and Management, mga kadagkuan sa nagkadaiyang Regional Development Council sa tanang rehiyon sa kabisayan ug mga miyembro sa gabinete ang rehabilitasyon ug pagpaugmad sa Chocolate Hills Complex ug ang pagpasemento sa Barangay Road paingon sa Banat-I Hill sa Barangay Bool ning dakbayan.
LOKAL NGA BALITA
MARSO 31, 2015
REYTUT’s
NASAYRAN NGA NORMAL ANG PANAW SA MGA BARKO UG WALAY KAUSABAN SA PLETEHAN GIKAN DINHI SA DAKBAYAN PAINGON SA MGA DESTINASYON NING PANAHON SA SEMANA SANTA
Gipahibalo sa mga kompanya sa mga panakayan sa kadagatan ang panaw sa ilang barko nga panahon sa Semana Santa.
Walay kausaban sa mga panaw sa Supercat gawas lang nga walay byahe sa ilang 1:45 sa hapon nga skedyul gikan dinhi sa siyudad sa Tagbilaran paingon sa Sugbo tungod kay naguba pagbalik ang MV St. SielThiel ug wala pay pahibalo kanus-a kini makabalik.
Ang Weesam Express usab walay kausaban sa ilang kada adlaw nga mga panaw samtang ang Ocean Jet pinaagi ni Malou Pacatang, supervisor sa OceanJet dinhi sa siyudad nipahibalo nga gikan karon hangtud sa adlaw’ng Huwebes, walay kausaban sa skedyul sa ilang mga fastcraft sa matag adlaw nga biyahe apan karong Biyernes Santo, Abril 3, ang skedyul sa panaw sa ilang mga barko gikan dinhi sa siyudad paingon sa Sugbo mao lang ang alas 9:20 sa buntag, alas 4:20 sa hapon ug alas 6:30 sa sayong kagabihon samtang gikan sa Sugbo paingon dinhi sa Tagbilaran mao ang alas 8 ug alas 9 sa buntag ug alas 4:20 sa hapon.
Aduna say special trip sa OceanJet nga nagsugod niadtong Marso 27 hangtud na karong Abril 6 gikan dinhi paingon sa Sugbo alas 8:30 sa buntag. Nasayran usab nga walay kausaban sa pletehan sa mga barko.
LOKAL NGA BALITA
MARSO 31, 2015
REYTUT’s
GIPAMATUD-AN NI DILG PROVINCIAL DIRECTOR MA. LOUELA LUCINO NGA DIHAY MGA LOKAL NGA OPISYAL NGA WALA MOTUMAN SA ILANG TRABAHO DIHANG GIHAPAK ANG BOHOL SA MGA MILABAY’NG KALAMIDAD SAMA SA BAGYO
Gipamatud-an sa direktor sa Department of Interior and Local Government dinhi sa Bohol nga dihay mga lokal nga opisyal sa lalawigan nga wala motuman sa ilang mga trabaho dihang giigo ang Bohol sa mga milabay’ng kalamidad ilabina gyud sa bagyo.
Atul sa Provincial Convergence Action Planning kagahapon didto sa JJ’s Seafoods Village, matud ni Provincial Director Ma. Louela Lucino atul sa pakighinabi sa DYRD Balita nga ang ilang buhatan maoy mi-susi kalabot sa taho nga dihay mga lokal nga opisyal nga giingong wala sa ilang mga tagsa-tagsa ka mga lugar dihang miigo ang mga katalagman.
Walay gibutyag si Lucino nga mga pangalan sa mga lokal nga opisyal apan gipamahayag niya nga balido ang mga rason niini maong walay silay gipahamtangan og silot dihang gisusi nila kini.
Dugang pa ni Lucino nga kinahanglan gayud nga naa sa ilang tagsa-tagsa ka mga hurisdiksyon ang mga lokal nga opisyal kung miigo ang mga katalagman.
LOKAL NGA BALITA
MARSO 31, 2015
REYTUT’s
GIPANGUSGAN NI KONGRESISTA ARIS AUMENTADO ANG PAGBOBO OG PONDO ALANG SA MGA MANANAGAT NGA NAGPROBLEMA TUNGOD KAY WALAY SILANG ICE, FREEZER UG WALAY SILAY KURYENTE ILABINA SA MGA KAISLAHAN
Gipangusgan ni Kongresista Aris Aumentado ang pagbobo og pondo para sa mga mananagat aron dpili na sila moapil sa illegal nga pagpanagat ug magpadaghan sa ilang abot para tukoran sila og storage plant aron pagsiguro sa maayong presyo sa isda.
Ang mga mananagat mireklamo nga napugos sila sa pagbaligya sa ilang abot didto sa Sugbo bisan mubo ang palit didto kay paliton man tanan.
Gusto sa mga mananagat bisan dili kuhaon tanan ang presyo dinhi sa dakbayan sa Tagbilaran kay dili sila mobati’g gimanipula ang presyo.
Nagproblema ang mga mananagat kay wala silay ice ug freezer busa giuna ni kongresista Aumentado ang pagdala og elektrisidad sa kaislahan aron makabaton og kuryente para matukoran og storage plant mao nga naaprobahan sa National Electrification Administration kon NEA ug sa NAPOCOR nga sugdan dayon ang submarine cable gikan sa lungsod sa Talibon hangtud sa mga isla sa mahanay, jandayan ug banacon aron makatukod og storage plant. Matud ni kongresista Aumentado nga ang tanang 35 ka isla sa Segundo distrito maka-kuryente hagtud sa sunod tuig.
Link back to: Live Radio Recorded Broadcast Hot Topics