REPORT FROM REY TUTAS – MARCH 24, 2015
Mar 24th, 2015 by Latest News
LOKAL NGA BALITA
MARSO 25, 2015
REYTUT’s
MOKABAT SA KAPIN 47 MIL KA MGA TINUN-AN SA MGA PANGPUBLIKONG TUNGHAAN SA ELEMENTARYA UG SEKONDARYA SA DAKBAYAN SA TAGBILARAN UG SA LALAWIGAN SA BOHOL MO-GRADWEYT KARONG SEMANAHA
Mokabat sa kapin 47 mil ka mga tinun-an sa mga pangpublikong tunghaan sa dakbayan sa Tagbilaran ug sa lalawigan sa Bohol mopaso sa gradwasyon karong semanaha. Kini sumala sa Department of Education.
Sa talaan sa buhatan sa Dep-Ed dinhi sa Bohol. Gibana-banang mokabat tanan sa 44 ka libo ka mga tinun-an ang mo-gradweyt sa elementarya ug sekondarya.
Sa kapin 44 mil ka mga estudyante, 27,871 ang mo-grdweyt sa Grade 6 samtang 16, 445 sa 4th Year High School. Gikatakdang mopahigayon sa ilang gradwasyon ang mga pangpublikong tunghaan sa Marso 27 hangtud na sa katapusang petsa karong bulana, Marso 31.
Dinhi sa dakbayan sa Tagbilaran, gibutyag ni Assistant City Schools Division Superintendent Dr. Marcelo Palispis nga 1,700 ka mga Grade 6 nga tinun-an ang mo-gradweyt samtang 1,650 ka mga 4th year high school.
Subling nagpahinumdom si Provincial Schools Division Superintendent Dr. Wilfreda Bongalos sa mga magtutudlo ug mga ginikanan nga himuong simple apan mabulokon ang gradwasyon.
LOKAL NGA BALITA
MARSO 25, 2015
REYTUT’s
GIKATAKDANG MOPAUBOS SA DEPUTATION SEMINAR KARONG SEMANAHA ANG MGA KADAGKUAN SA LAND TRANSPORTATION OFFICE DINHI SA BOHOL DIDTO SA LALAWIGAN SA SUGBO
Gikatakdang mopaubos sa deputation seminar karong semanaha didto sa lalawigan sa Sugbo ang mga kadagkuan sa tulo ka mga lokal nga buhatan sa Land Transportation Office kon LTO dinhi sa Bohol.
Kini sumala pa ni Erwin Patalinghug, Officer In Charge sa LTO-Tagbilaran District.
Matud ni Patalinghug nga sugod karong Marsdo 26, Huwebes hangtud na sa Marso 28, Sabado mopailawom sila sa seminar.
Hayan hisgutan sa seminar ang Joint Administrative Order kon JAO, pagpatuman sa Anti-Drunk and Drugged Driving Law kon Republic Act 10586 lakip na ang Temporary Operators Permit kon TOP nga hangtud karon wala pa maisyuhi ang mga buhatan LTO sa Bohol.
Gipaabot usab nga mahidangat dinhi sa lalawigan ang Operations Chief sa LTO Region 7 nga si kanhi Tagbilaran LTO Registrar Joel Maloloy-on uban ang mga technical team nga maoy mobansay kabahin sa pagamit sa Alcoholic Breath Analyzer kon ABA nga hangtud karon sukad napatuman ang maong balaod wala pay gihuptan nga aparato ang mga lokal nga buhatan sa LTO sa probinsiya.
LOKAL NGA BALITA
MARSO 25, 2015
REYTUT’s
GIPADAYAG SA KANHI MAYOR SA LUNGSOD SA PANGLAO NGA SI BENEDICTO ALCALA NGA DILI NA SIYA MOSALGA PAGBALIK SA POLITIKA SAMTANG GIPADAYAG NIYA ANG IYANG PAGSUPORTA KANG DAVAO CITY MAYOR RODRIGO DUTERTE BISAG DILI PA TATAW KUNG MODAGAN BA KINI PAGKA-PRESIDENTE SA NASUD
Dili pa man tuod tataw kung modagan sa pagka-presidente sa nasud si Davao City Mayor Rodrigo Duterte apan gipadayag na ni kanhi Panglao Mayor Benedicto Alcala ang iyang pagsuporta sa mayor sa pinakadakong siyudad sa tibuok Pilipinas.
Kini ang gipamahayag ni Alcala nga nipadayag nga dili na siya mosalga pagbalik sa politika apan kung walay laing mangusog sa pagpukan sa kasamtangan karon nga namunuan sa lungsod , mapugos siya og dagan kontra ni Mayor Nila Montero.
Matud ni Alcala nga sa mga nitumaw nga mga pangalan nga molansad sa pagka-presidente, si Duterte ang iyang buligan.
Gawas kang Duterte, ang mga mitumaw nga mga pangalan nga modagan sa pagka-presidente sa umaabot 2016 nga piniliay mao sila si Bise Presidente Jejomar Binay, DILG Secretary Mar Roxas, Senadora Grace Poe, Kanhi Presidente ug karon Mayor sa Manila nga si Joseph”Erap”Estrada.
Nakadayeg si Alcala kang Duterte sa maayong pagdumala niini sa dakbayan sa Davao nga miuswag pag-ayo.
Gitakdang mobisita dinhi sa Bohol karong huwebes si Duterte nga nangusog sa Federal nga pangagamhanan.
LOKAL NGA BALITA
MARSO 25, 2015
REYTUT’s
PATAY HUMAN NALUMOS ANG MANAGSUON UG LUWAS ANG ANAK SAMTANG NANGALIGO SA DAGAT DAPIT SA MAY TULAY SA LUNGSOD SA DAUIS KAGAHAPON SA BUNTAG
Patay na nga nahidangat sa tambalanan ang managsuon human nalumos samtang nangaligo sa dagat dapit sa may tulay sa Jacinto Borja sa lungsod sa Dauis kagahapong adlawa. Ang mga biktima gipaila nga sila si Emelita Ramirez, 33 anyos ug igsuon nga si Percy Punla, 35 anyos taga Sitio Katayngan, Brgy. Mansasa ning dakbayan samtang naluwas ang anak ni Percy Punla nga si Jessebel, 6 anyos.
Sumala sa taho nga nangaligo sa dagat sa Dauis ang mga biktima kagahapon sa mga alas 9 sa buntag dihang ang 6 anyos nga bata nalumos sa cantelado ug kusog nga sog sa tubig hinungdan nga giluwas kini apan ang managsuon maoy nalumos.
Atul sa maong hitabo, hunas ang dagat apan wala nasayod ang mga biktima nga kantelado ug sog ang bahin sa dagat nga ilang gikaliguan.
Gidala ang mga biktima sa tambalanan pinaagi sa TARSIER 117 apan ang 6 anyos nga bata lang ang naluwas gikan sa piho nga kamatayon.
Link back to: Live Radio Recorded Broadcast Hot Topics