REPORT FROM REY TUTAS – APRIL 9, 2015
Apr 10th, 2015 by Latest News
LOKAL NGA BALITA
ABRIL 9, 2015
REYTUT’s
NAGLARAW SI KALIHIM FRANCIS PANGILINAN SA OFFICE OF THE PRESIDENTIAL ASSISTANT FOR FOOD SECURITY AND AGRICULTURAL MODERNIZATION NGA MOSALGA SIYA PAGBALIK SA POLITIKA SA SUNOD TUIG NGA PINILIAY
Naglaraw si Presidential Assitant for Food Security and Agricultural Modernization Secretary Francis Pangilinan nga mosalga siya pagbalik sa politika sa sunod tuig nga piniliay.
Sa ekslusibong pakighinabi sa DYRD Balita kang Secretary Pangilinan atul sa pagsubo sa National Irrigation Administration Training Center kagahapon, gipahayag niya ang posibilidad nga mobalik siya sa politika sa tuig 2016 apan wala siyay gibutyag kung unsang posisyon ang iyang lansaran.
Si Secretary Kiko Pangilinan kinsa bana ni Megastar Sharon Cuneta niingon nga layo pa ang piniliay ug daghan pang mga kinahanglang sulbaron nga mga suliran ug hataga’g pagtagad nga mga programa ilabina sa sektor sa agrikultura.
Ang kanhi senador ug mag-uuma maoy pinasidunggang dinapit ug mamumulong sa pagsaulog sa ika-6 ka tuig nga sumad sa National Irrigation Administration ug inagurasyon sa NIA training center ug ubang building nga nahimutang sa buhatang rehiyonal sa National Irrigation Administration sa Barangay Dao ning dakbayan.
LOKAL NGA BALITA
ABRIL 9, 2015
REYTUT’s
GIDASIG NI GOBERNADOR EDGAR CHATTO ANG MGA MAG-UUMA NGA IPADAYON ANG PAGTINABANGAY ARON MAGPABILIN USAB ANG TAAS NGA ANG-ANG SA RICE SELF SUFFICIENCY UG MOTAAS PA ANG PERFORMANCE SA AGRIKULTURA SA PROBINSIYA NGA NAKAB-OT SA NIAGING TUIG BISAN SA DAGHANG MGA HAGIT
Gidasig ni Gobernador Edgar Chatto ang mga mag-uuma nga ipadayon ang pagtinabangay aron magpabilin usab ang taas nga rice self sufficiency level nga nakab-ot sa probinsiya sa Bohol sa niaging tuig.
Atul sa pagsaulog sa ika-6 ka tuig nga sumad sa buhatang rehiyonal sa National Irrigation Administration kagahapon dugang sa pagsubo sa NIA Training Center nga gitambungan ni Presidential Assistant for Food Security and Agricultural Modernization Secretary Francis Pangilinan isip pinasidunggang mamumulong, gipahayag ni Gobernador Chatto nga gawas sa turismo ug pagduso sa mga information technology, nagpabiling gipangusgan sa probinsiya ang natad sa agrikultura ilabina sa mga kahumayan, high value crops ug sektor sa mga mananagat alang sa produksiyon sa tibuok central visayas.
Mapasalamaton ang gobernador sa mga nagdumala sa National Irrigation Administration nga bisan sa daghang mga hagit sama sa El Niño, paghapak sa mga katalagman ug kausaban sa klima, nakab-ot sa Bohol ang 108 porsyento nga rice self sufficiency sa niaging tuig 2014 tungod sa pagtinabangay sa mga bol-anon ug paggamit sa mga mag-uuma sa mga pasilidad sa irrigasyon ug teknolohiya.
LOKAL NGA BALITA
ABRIL 9, 2015
REYTUT’s
GIAWHAG SA MGA KADAGKUAN SA PROBINSYA ANG MGA BOL-ANON NGA SUPORTAHAN ANG BOL-ANONG KANDIDATA ALANG SA MISS EARTH PHILIPPINES 2015 NGA SI GAYLE SUZETTE GARCES YU, ANAK NI CALAPE MAYOR SULPICIO YU
Gisuportahan sa mga kadagkuan sa probinsiya sa Bohol ang bol-anong kandidata sa alang sa Miss Earth Philippines 2015 nga si Gayle Suzette Garces Yu.
Atul sa session sa Sangguniang Panlalawigan kagahapon nga gipangulohan ni Bise Gobernador Concepcion Lim, mipasar og resolusyon ang mga bokal sa probinsiya nag-awhag sa mga bol-anon sa pagsuporta kang Gayle Suzette Yu sa naasoyng beauty pageant pinaagi sa online voting o sa bisan sa unsang paagi.
Ang 23 anyos nga anak ni Calape Mayor Sulpicio Yu ug usa ka registered nurse napurong-purongan isip Miss Philippines Earth-Bohol Search niadtong Domingo, Marso 29 sa Island City Mall Activity Center maoy pambato sa Bohol alang sa umaabot Miss Philippines Earth 2015 Pageant karong Mayo didto sa SM Mall of Asia Arena.
Mipasar usab ug laing resolusyon ang Sangguniang Panlalawigan nga nagtugot kang Gobernador Edgar Chatto sa paggahin og pondo alang sa mga katuyuan sa pambato sa Bohol.
LOKAL NGA BALITA
ABRIL 9, 2015
REYTUT’s
GIDAYEG NI PRESIDENTIAL ASSISTANT FOR FOOD SECURITY AND AGRICULTURAL MODERNIZATION SECRETARY FRANCIS PANGILINAN ANG MGA MAG-UUMA TUNGOD SA SAKRIPISYO ARON MAPAKAON LANG ANG MGA KATAWHAN
Gidayeg ni Presidential Assitant for Food Security and Agricultural Modernization Secretary Francis Pangilinan ang paningkamot sa mga mag-uuma nga mahatagn og pagkaon ang mga katawhan.
Sa iyang mensahe atul sa pagsaulog sa ika-6 ka tuig nga sumad sa National Irrigation Administration kon NIA kagahapon dungan sa pagsubo sa NIA Training Center, gipahayag ni kalihim Pangilinan nga kinahanglang tahuron ug hataga’g bili sa mga tawo ang sakripisyo sa mga mag-uuma.
Matud sa kanhi senador nga dako ang iyang pagtahud ug paghigugma sa mga-uuma kay usa sab siya ka mag-uuma kaniadto. Gipaambit niya ang iyang lisod nga kasinatian kaniadto dihang nihapak ang katalagman sa dihang nagtikad siya sa ilang umahan.
Sama ni Gobernador Edgar Chatto, gipakadak-an usab ni kalihim Pangilinan ang agrikultura nga usa sa mga tinubdan sa panginabuhian sa mga katawhan.
Link back to: Live Radio Recorded Broadcast Hot Topics