REPORT FROM CEL REMOLADOR GIKAN SA MGA KALUNGSURAN UG DAKBAYAN SA BOHOL
Mar 7th, 2015 by Latest News
DYRD RADYO BALITA
BY: CEL REMOLADOR
07 March 2015
TAGBILARAN CITY – Malamposong nasikop sa hiniusang bahan sa kapolisan sa dakbayan sa Tagbilaran ug mga sakop sa Provincial Intelligence Branch nga gipangunahan ni Police Senior Insp. Jojit S. Mananquil sa gipahigayon niining buy-bust operation batok sa gikatahapang big time nga tigpayuhot sa ginadili nga drugas sa distrito sa Mansasa ug Lindaville Subd. Nga nailhang Jovane C. Orenia kinsa kasamtangang naga puyo sa may dan Espuelas extn., barangay Poblacion 2 , ning siyudad sa Tagbilaran .
Matud pa positibong napalitan ug nakuhaan sa 11 ka gagmayng putos sa gidudahang drugas lakip ang kalibre .45 nga pistola ug 11 ka mga bala ug duha ka mga magazines sa armas de fuego . Kasamtangan karong gikustodiya sa kapolisan sa siyudad ang maong suspetsado . ( 06 1830hmar.fri. )
CLARIN – Gitulis sa wa mailhing duha ka mga tulisan ang tulo ka mga biktima kinsa nagapailang Analiza D. Sipsip 23 dalaga nga taga Poblacion Sagbayan , Cheryl R. Lamoste 28 minyo ug Emilita A. Dinoy 38 minyo nga pulos taga barangay San Ramon , Sagbayan .
Sa asoy sa mga biktima matud pa nga paingon na unta kini sa lungsod sa Sagbayan lulan sa usa ka motorsiklo mga alas 8:45 sa gabii sa milabayng huebes Marso 5, 2015 apan paghidangat niini sa barangay Mataub , Clarin kalit miguhot ang mga suspetsado ug gibagbagan ang motorsiklo nga gisakyan sa mga biktima .
Nahagba sa kalsada ang mga biktima ug gitulis kini gamit ang wa matino nga kalibre sa armas de fuego . Daling misibat ang mga tulisan dagit ang mga bag sa biktima lakip ang mga importanteng dokumento . ( 05 2045hmar.thurs. )
LOAY – Pormal nga nga gipasakaan ug sumbong kalambigitan sa ginadili nga drugas ang tulo ka mga gikatahapan nga giilang Mauricio E. Amoy Jr. sa pagtinir niini ug suyopanan sa ginadiling drugas ug laing duha ka mga suspetsadong si Arnel Simbajon ug Teresito O. Salinas nga mibisita sa gitohoang drug den .
Gibutyag base sa chemistry report sa PNP Crime Laboratory sa kampo Dagohoy nga mitimbang sa .14 gramos nga shabu ang nakuha gikan kang Mauricio Amoy Jr. atol sa ronda .
Kasamtangan karong nabalhug sud sa selda sa kampo Dagohoy ang mga gikatahapan .
Link back to: Live Radio Recorded Broadcast Hot Topics
