REPORT FROM C. REMOLADOR – APRIL 12, 2915
Apr 12th, 2015 by Latest News
DYRD RADYO BALITA
09 April 2015
CARMEN – Patay sa engkwentro and duha ka mga gikatahapan human nakigpinunsilay sa nagrespondeng kapolisan sa Carmen nga gipangunahan ni Police Senior Inspector Cresente A. Gurrea .
Matud pa nadawat sa kapolisan ang usa ka alarma kalabot sa lima ka tawo nga matud pa nang gisuyop sa ginadiling drugas sud sa usa ka farm house didto sa barangay Matin-ao , Carmen mga alas 8:30 sa gabii mierkoles Abril 8, 2015 .
Matud pa human makamatikod sa kapolisan ang mga suspetsado daling misibat ang tulo ka mga kauban agi sa likod nga bahin sa maong farm house samtang ang duha ka mga gikatahapan mibunot sa ilang armas de fuego ug gipusil ang bahan sa kapolisan .
Napugos ang kapolisan paggamit sa ilang armas de fuego ug nahitabo ang sinukliay sa bala . Patay diha diha ang duha ka mga gikatahapan nga nailhan sa kapolisan nga Priscillano C. Quirol kinsa nakaangkon ug pinusilan sa ilok ug paa ug usa ka Danilo M. Dublado 24 ulitawo pulos molupyo sa sitio Centro barangay Matin-ao , Carmen nga nakaangkon usab ug pinusilan sa o ug ubang bahin sa lawas .
Napalgan sa mga sakop sa SOCO sa maong lugar ang usa ka granada , kalibre .357 nga rebolber ug daghang bala sa kalibre .357 ug .38 kalibre nga rebolber , lakip ang 18 ka gagmayng putos , usa ka médium nga putos ug laing lima ka dagkong putos nga pulos gidudahang shabu nga nakuha gikan kang Quirol .
Nakuha usab gikan kang Dublado ang usa ka kalibre .9mm nga pistola ug mga bala lakip ang 10 ka gagmayng putos sa gidudahang shabu . Ubos na karon sa kustodiya sa kapolisan sa Carmen ang napalgan nga mga butang . ( 08 2030hapr.wed. )
SAGBAYAN – Nasapon sa akto sa bahan sa kapolisan sa Sagbayan nga gipangunahan ni Police Senior Inspector Ricardo B. Tero ang duha ka mga gidudahang tigpayuhot sa ginadili nga drugas nga nailhang Raulito L. Man-on 36 minyo ug nakuhaan sa unom ka gagmayng putos sa gidudahang shabu .
Samtang ang wa mailhing kauban ni Raulito L. Man-on abtik nga nakaipsot agi sa likod nga bahin sa maong panimay .
Nahitabo ang maong pagresponde mga alas 7:00 sa gabii sa milabayng mierkoles Abril 01 , 2015 didto sa may sitio Hillside barangay Poblacion , Sagbayan .
CATIGBIAN – Nabalhug na karon sud sa selda sa Catigbian ang 43 anyos nga mag-uuma nga gipailang Pepito F. Batistis nga taga barangay Liboron , Catigbian human kini positibong gitumbok base sa nakasaksi nga matud pa maoy responsable sa pagpanubdub sa usa ka umahan nga gipanag-iya sa banay nga Digaum nga taga barangay Baang , Catigbian nga nahitabo mga alas 7:50 sa gabii sa milabayng domingo Abril 5, 2015 .
Sa imbestigasyon sa kapolisan nasayran nga naugdaw ang mga punoan sa lubi ug mga kahoyng mahogany atol sa maong sunog . Gisikop gilayon ang maong gikatahapan sa nagrespondeng kapolisan sa Catigbian . Kasong kalapasan sa PD 1613 kalambigitan sa kasong Arson ang giatubang karon sa maong gikatahapan . ( 05 1950hapr.sun. )
GUINDULMAN – Pormal nga nga gipasakaan ug sumbong kasong kalapasan pagpayuhot ug paghupot sa ginadiling drugas batok sa gikatahapang si Joemel Torres human masikop sa gipahigayong buy-bust operation sa kapolisan sa Guindulman .
Gibutyag base sa chemistry report sa PNP Crime Laboratory sa kampo Dagohoy nga matud pa mitimbang sa .14 gramos nga shabu ang nasakmit kang Torres ug mitimbang sa .08 gramos nga shabu ang napalit gikan sa maong suspetsado . ( 06 april 2015 )
DAUIS – Gisikop sa kapolisan sa Dauis base sa Arrest Warant nga gipagawas ni Judge Raul P. Barbarona sa 14th MCTC nga naka base sa Dauis ug Panglao penetsahan Pebrero 02 , 2015 batok kang Eduardo A. Verano 43 minyo nga taga barangay Tinago , Dauis sa kasong Malicious Mischief .
DAGOHOY – Gihatud sa tambalanan ning siyudad sa Tagbilaran ang 79 anyos nga lola kinsa gipailang Lolita Ll. Santos nga taga barangay Sta. Cruz , Dagohoy human kiniaksidente nga napunggit sa usa ka Isuzu nga sakyanan nga gimaneho sa nailhang driver nga Wilfredo C. Sarigumba 62 nga taga barangay Poblacion Ondol , Loboc .
Nahitabo ang maong insidente mga alas 7:50 sa buntag adlawng lunes Abril 6, 2015 . Matud pa ang maong sakyanan paingon sa lungsod sa Candijay apan paghidangat sa nasudnong dan sa barangay Sta. Cruz , Dagohoy wa makabantay ang driver sa kalit nga paglabang sa biktima nga paingon na unta mosakay sa Southern Star Bus paingon sa Carmen . Nahagbang ang biktima ug nakaangkon kini ug mga angol sa kalawasan . ( 06 0750hapr.mon. )
Link back to: Live Radio Recorded Broadcast Hot Topics