REPORT FROM ALLEN DOYDORA – MARCH 31, 2015
Apr 1st, 2015 by Latest News
MARCH 31 / LOCAL NEWS / ALLEN D.
Gitay-og ug magnitude 4.7 nga linog ang lalawigan sa Bohol nga natala alas 9:47 sa buntag kagahapong adlawa.
Matud sa Phivolcs, nga natumbok ang sentro sa linog sa gilay-ong walo ka kilometro sa sidlakang bahin sa lungsod sa Buenavista.
Adunay gilawmon ang maong linog nga tulo ka kilometro ug tectonic ang origin.
Samtang nakatala usab ug intensity 5 ang lungsod sa San Maiguel, intensity 4 sa Lapu-lapu City ug Buenavista, Bohol intensity 3 usab didto sa Iloilo City; Bogo City, Cebu; Tagbilaran City; Bacolod City ug intensity 1 Pres. Roxas, Capiz.
Sa maong hitabo wala hinooy natala nga kadaut o samdan human sa maong pag-tay ug.
MARCH 31 / LOCAL NEWS / ALLEN D.
Gi-sugdan na sa Land Transportation Office kagahapong adlawa ang Oplan Ligtas Biyahe pinaagi sa inspeksyon sa tanang mga sakyanan diha sa mga bus terminal ug sa mga kadalanan isip paghandum sa semana santa.
Matud ni LTO registrar Erwin Patalinghug nga adunay silay gipamutang nga mga public assistance desk sa mga terminal aron adunay kadangpan ang publiko kung aduna may reklamo.
Partikular nga gi-susi sa LTO ang mga depasaheruang sakyanan nga mobiyahe ngadto sa nagkadaiyang lungsod dinhi sa probinsya sakay ang mga pasahero nga mamauli sa ilang tagsa-tagsa ka mga dapit alang sa paghandum sa semana santa.
Samtang padayon usab nga gipahimangnuan ang mga driver nga siguruhong anaa sa kondisyon ang ilang mga sakyanan sa dili pa mobiyahe aron luwas ang tanang pasahero.
Gi-awhag usab ang publiko nga mo-sumbong sa ilang buhatan kon ugaling adunay mga bus nga mopasaka sa ilang plitehan karong panahon sa semana santa.
MARCH 31 / LOCAL NEWS / ALLEN D.
Walay ikanselar sa mga biyahe sa mga abyon karong panahon sa semana santa.
Kini subay sa gihimong pakisusi sa dyrd balita sa tagbilaran city airport.
Suma sa mga kawani sa mga airline company nga PAL, CEBU PACIFIC, TIGER AIR UG AIR ASIA nga walay kausaban sa biyahe sa mga abyon subay sa pag-handum sa holy week particular na sa adlawng hwebes, byernes ug sabado lakip na sa domingo.
Sa laing bahin nangandam usab ang tagdumala sa tugpahanan ning dakbayan sa paghandum sa semana santa pinaagi sa gimugna niining oplan ligtas biyahe sama sa paghatag ug first aid sa mga pasahero kon ugaling adunay madisgrasya.
Samtang ang kapulisan sa airport nakaalerto usab aron siguroon nga luwas ang mga pasahero sa ilang pagbiyahe.
MARCH 31 / LOCAL NEWS / ALLEN D.
Gidawat sa mga mayor sa kalungsuran dinhi sa lalawian sa bohol ang disaster preparedness manual atol sa launching niini dungan sa gipahigayong provincial convergence action planning LISTO movement nga gihimo kagahapong adlawa sa jjs sea foods village dinhi sa syudad.
Gipangunayan ang pagpang apo-apod sa mga manual sa mismong Regional Director sa Department of Interior and Local Government kon DILG nga si director Anannias Villacorta.
Matud pa kang villacorta nga unod sa nahisgutang manual mao ang listahan sa mga gikinahanglang buhaton sa matag local government unit kon LGU aron hugot nga mapangandaman ang mga nagkadaiyang katalagman ug kalamidad nga posibling motumaw.
Suma ni villacorta nga kinahanglang adunay saktong kasayuran ang matag LGU kung unsa ang mga nag-una ug angayan nga himoon aron masalbar ang katawhan sa ilang dapit kon ugaling aduna may mga kalamidad.
Samtang gi-awhag usab sa opisyal ang publiko nga sundon kung unsa man ang mando gikan sa mga opsiyal sa kalungsuran hangtud na sa kabaragayan.
Subay sa paghatag sa disaster preparedness manual nasayran nga walo lang ka mga mayor ang mitambong ug midawat niini.
Link back to: Live Radio Recorded Broadcast Hot Topics