Report from Allen Doydora – March 20, 2015
Mar 22nd, 2015 by Latest News
March 20 / Local News / Allen D.
Gitugutan na sa Maritime Industry Authority kon MARINA 7 nga makalawig pag balik ang usa ka fast craft sa 2GO Shipping Lines human sa pagkadisgrasya niini didto sa pier sa cebu niadtong milabayng semana.
Kini moay gikumpirma ni Commodore Rodolfo Villajuan ang labaw sa Philippine Coast Guard sa cebu atol sa pakighinabi sa dyrd balita.
Matud ni villajuan nga niadtong adlawng martes gilibkas na sa MARINA ang suspension order ngadto sa MV. St Sealthiel diin particular nga gi-suspenso niini mao ang passenger safety certificate.
Kahinumduman nga ang MV. St Sealthiel Gikan sa dakbayan sa Tagbilaran luwan sa gatusan ka mga pasahero diin pag-abot sa cebu nakasinati ug maneuvering control failure ug mibanga kini sa sementadong bahin sa peir nga moay hinungdan sa pagkaangol sa 21 ka mga pasahero.
March 20 / Local News / Allen D.
Uyon si Mayor Merriam Sumaylo sa lungsod sa Dauis kabahin sa planong pag-tukod ug pantalan sa barangay tangnan lungsod sa panglao.
Kini human nakita sa mayor nga kung sugdan na ang pagtukod sa New Bohol Airport ug manghakot ug mga bug-at nga materyales basin madaut o mahugno ang tulay sa dauis kung ikarga lang ug mga dagkong sakyanan nga mo-agi sa moang tulay.
Matud ni sumaylo nga maayong pamaagi ang pag-himo ug pantalan sa panglao aron dili madaut ang duha ka mga tulay nga nag-dugtong sa isla sa panglao ug sa syudad sa Tagbilaran.
Ang pag-tukod sa new bohol airport gikatakdang sugdan na sa dili madugay human sa bidding diin gipanghinaut sa mayor nga sa mas daling panahon makabaton usab ug kaugalingon pantalan ang panglao aron nga kadunguan sa mga barko nga magdala sa mga dagkong materyales nga gamiton sa pagtukod sa moang tugpahanan.
March 20 / Local News / Allen D.
Karong adlawa sa alas 8 sa buntag ipahigayon ang pag-susi ug pag calibrate sa mga timbangan sa central public market.
Kini maoy gibutyag ni Pedrinio Besa labaw sa Economic Business Enterprises kon EBE sa pakighinabi sa dyrd balita.
Suma pa kang besa nga ang pagpahigayon ug inspeksyon sa mga timbangan himoon sa tanang mga naninda sulod sa central public market, diin mamahimo nilang kompiskahon ang mga timbangan nga dili haum sa saktong timbang.
kadtong mga tindera nga makuhaan ug depektosong timbangan gipahimanuan nga mopalit ug bag-o.
karong tuiga gibutyag ni besa nga ning-minus ang nagapanikas sa ilang mga timbangan gumikan na usab sa ilang gipahigayon nga regular nga pag-inspeksyon.
March 20 / Local News / Allen D.
Subling gi-tataw ni Bohol Dep-Ed Provincial School Supt. Welfreda Bongalos nga mamahimong makuha sa mga studyante ang ilang mga card bisan paman nga dili makabayad sa mga tampuhan sama sa boys scout, girls scout, red cross ug uban pa.
hinoon gipasabot ni bongalos nga adunay mga bayranan nga kinahanglang mabayaran sa mga studyante sanglit nalakip na kini sa mandato sa matag tulunghaan, apan kung dili makabayad ang studyante dili usab makapamugos ang mga magtutudlo kon dili ipaagi sa saktong proseso.
Samtang gipahimangno pag usab ni bongalos nga himoon simple ang mga seremonyas sa graduation.
Iyang gibutyag nga ang simple nga seremonyas pinaagi lang sa mga naandan nga pamaagi, diin bisan ang mga graduating students mamahimo lang makasuot ug school uniforms sa ilang pagpaso.
Gawas niini walay nay handa nga pagkaon human sa graduation aron malikayan ang dakong gasto sa matag tulunghaan sanglit matag panimalay aduna namay naka-andam nga nagkadaiyang pagsaulog sa adlaw sa graduation.
Link back to: Live Radio Recorded Broadcast Hot Topics