REPORT FROM ALLEN DOYDORA – APRIL 9, 2015
Apr 10th, 2015 by Latest News
April 9 / Local News / Allen D.
Gumikan sa nagpadayong suliran sa mga sakyanan nga kolurom ilabi na sa mga van for hire kon v-hire nga anaa gawas sa integrated bus terminal ning dakbayan, ang tagdumala sa IBT nga si Inday Inting nanawagan ngadto sa mga kadagkuan sa Land Transportation Office kon LTO nga gukdon ug pang-dakopon ang mga kolurom nga mga v-hire.
Suma pa ni inting nga sagad sa mga kolurom nga v-hire gidid-ang makasulod sa terminal diha na sa gawas sa terminal manguha ug pasahero particular na atubangan sa island city mall.
Matud ni inting nga sa pagkakaron nagkadaghan ang mga kolurom gawas sa terminal ilabi na nga gi-sugdan ang pagpatuman sa istriktong pamaagi sulod sa IBT pinaagi sa pagpalukat ug mayors permit sa mga driver ug operator.
Nang-hinaut si inting nga mahimuan ug aksyon sa LTO ang maong suliran.
Samtang gi-awhag nalang niini ang mga pasahero nga dili mo-sakay sa mga kolurom nga v-hire sanglit wala kini mga insurance kon ugaling adunay dili maayong mahitabo sa ilang pagbiyahe sa kadalanan.
April 9 / Local News / Allen D.
Gi-pasabot sa mga tinugyanan sa Provincial Fisheries and Aquatic Resources dinhi sa bohol nga wala nakaapekto ang kainit sa panahon karon ngadto sa mga dagkong fishpond sa lalawigan, kini human namatikdan nga ang ubang mga fishpond nahubsan ug tubig.
Suma pa kang Gloria Olabede Senior Aqua-Culturist sa BFAR bohol nga nga ang pagkahubas sa tubig sa mga fishpond gumikan sa pagpahigayon sa gitawag nga pond preparation.
Matud ni olabede nga ang pond preparation usa sa mga proseso nga kinahanglan sundon sa pagpamuhi ug mga isda sa mga fishpond ug usa niini ang pagpahubas sa tubig human sa ting-harvest.
Gi-klaro usab niini nga hangtud karon nga nasinati ang panahon walay report nga nakaabot sa ilang buhatan nga dunay mga fishpond ang naapektuhan sa kahimtang sa panahon.
Hinoon iyang gi-angkon nga kung ang usa ka fishpond dili makatuman sa saktong gilawmon ug walay igong tinubdan sa suplay sa tubig, adunay posilidad nga maapektuhan gyud kini sa kainit sa panahon.
April 9 / Local News / Allen D.
Mokabat sa kapin usa ka libo ka mga business establishments sa tibook Central Visayas ang na-isyuhan ug certificates of compliance sa Department of Labor and Employment kon DOLE region 7.
Ang nahisgutang mga stablisemento nga na-isyuhan sa maong certificates of compliance maoy naka-kompleto sa mga gikinahanglan nga gihatag sa DOLE pinasubay sa standard sa labor law.
Dinhi sa probinsya gibutyag ni Gerry Guidaben OIC sa DOLE bohol nga ubay-ubay usab ang mga stablisemento nga nalakip nga na-hatagan sa nahisgutang certificate.
Samtang padayon usab nga gipanawagan niini ang mga kompanya nga mo-comply sa tanang gikinahanglan kabahin sa labor standard sa boluntaryong pamaagi, diin ang DOLE abli sa kanunay alang sa pagtabang sa ilang mga kakuwangon.
April 9 / Local News / Allen D.
Gibanabanaang anaa lang sa 30 porsyento ang pagdagsa sa mga turista karong tuiga ilabi na karong summer diha sa mga nagkadaiyang beach resorts sa lungsod sa panglao.
Gi-hulagway ni sa pipila ka mga nanag-iya ug resorts sa maong lungsod nga wala pa gyud kaayo mibalik ang kadaghan sa mga turista sukad nga natagamtaman ang mga katalagman ug kalamidad sa probinsya sa bohol sama sa 7.2 nga linog niadtong tuig 2013.
Suma pa kang Dr. Dolorich Dumaluan usa sa mga nanagiya ug resorts sa panglao nga ang ihap sa mga turista karon dili pa gyud makaapas sa gidaghanon nga pagsaka niadtong tuig 2010 hangtud sa 2011.
Gi-angkon usab niini nga ang pagdaghan sa mga inland ug mountain resorts moay nahimong kompetensya sa negosyo sa mga beach resorts.
Gawas sa mga beach resorts dinhi sa bohol, gibutyag usab ni dumaluan karong tuiga unang higayon nga wala napuno ug mga bisita ang usa sa mga iladong beach resorts sa tibook pilipinas nga mao ang boracay.
Link back to: Live Radio Recorded Broadcast Hot Topics