NAKAIKYAS ATUL SA GIHIMONG RONDA KAGAHAPON SA BUNTAG ANG USA KA DAKONG TIGPAYUHOTAN OG SHABU APAN NAKAHIPOS GIHAPON ANG KAPOLISAN OG DAGHANG PUTOS NGA ADUNAY SULOD GITUOHANG SHABU SA PANIMALAY UG DRUG DEN SA DAN SIKATUNA SA BARANGAY COGON NING DAKBAYAN
Feb 27th, 2015 by Latest News
Nakaikyas atul sa gihimong ronda kagahapon sa buntag ang usa ka dakong tigpayuhot og shabu sa dan Sikatuna sa Brgy. Cogon ning dakbayan.
Gipaila ang gikatahapan nga usa ka Rey John Paz @ Yshang, 24 anyos, ulitawo nagpuyo sa naasoyng dapit sa distrito sa Cogon.
Si P/SInsp. Roland Desiree Lavisto , hepe sa Intelligence Section sa kapolisan sa siyudad ang nangulo sa ronda ubos sa mando ni P/CInsp. George Vale ug ang operasyon pinasikad sa search warrant nga gipagawas ni Executive Judge Suceso Arcamo sa Regional Trial Court Branch 47 ning dakbayan.
Bisag nakaikyas ang gikatahapan, nakahipos gihapon ang mga tinogyanan sa balaod sulod sa panimalay ug drug den sa gikatahapan sa duha ka dagko kon ginatawag nga “bulto” ug lima ka gagmay’ng putos nga pulos adunay sulod gidudahang shabu nga gibana-banang nagkantidad og kapin sa 20 mil pesos ug mga drug paraphernalia.
Si P/SInsp. Lavisto nagkanayon atul sa ekslusibong pakighinabi sa DyRD nga apil sa ilang target list sa mga drug personality karong buwana ang gikatahapan.
Ang pag-imbentaryo sa nasakmit nga mga gituohang shabu ug ubang ebidensiya gisaksihan sa taga DOJ, Brgy. Konsehal Martin Balbin ug Julian Torralba sa Brgy. Cogon ug taga Media.
Matud ni Lavisto nga bisag wala nila madakpi ang gikatahapan pasakaan gihapon nila kini og tukmang sumbong sa piskaliya.
Link back to: Live Radio Recorded Broadcast Hot Topics
