ANAA SA IKATULO NGA DAPIT ANG LALAWIGAN SA BOHOL SA TIBUOK CENTRAL VISAYAS NGA DAGHANG MGA TURISTA NGA NIBISITA SA NIAGING TUIG 2014 MATUD SA BUHATANG REHIYONAL SA DEPARTAMENTO SA TURISMO
Feb 27th, 2015 by Latest News
By Rey Tutas
Anaa sa ikatulo nga dapit ang lalawigan sa Bohol sa tibuok Central Visayas nga daghang mga turista ang nibisita sa niaging tuig 2014. Kini sumala sa buhatang rehiyonal sa Departamento sa Turismo sa Rehiyon 7.
Nanguna gihapon ang Cebu nga adunay 2.97 milyon ka mga tourist arrival diin 1.3 ka milyon niini mga langyaw’ng turista, ikaduha ang Negros Oriental nga nakatala og 518,571 gisundan sa Bohol nga adunay 438,908 ug katapusan ang Siquijor, 40, 485.
Sa talaan sa Department of Tourism- Region 7, mikabat sa 3.97 ka milyon ka mga turista ang natala sa tibuok Central Visayas diin nisaka kini og 13.91 porsyento itandi sa tourist arrival niadtong 2013.
Sa 3.97 ka milyon ka mga turista, 2.4 milyon niini mga lokal samtang 1.6 ka milyon mga langyaw.
Nagpabiling nag-una nga tinubdan sa rehiyon ang mga koreano nga dunay 594, 985, ikaduha ang mga hapon- 243, 565 ug ikatulo ang mga amerikano gisundan sa mga turista gikan sa China ug katapusan ang Australia.
Tungod sa nahitabong kalamidad sama sa superbagyong Yolanda niadtong 2013 ug ang pasidaan sa Beijing nga dili una mobisita sa Pilipinas ang hinungdan nga wala makuha sa Department of Tourism ang ilang target nga 6 ka milyon ka mga langyaw’ng turista sa niaging tuig 2014.
Dinhi sa Bohol, ang mga kadagkuan sa probinsiya ug mga tinogyanan sa turismo padayong nangita og mga pamaagi sama na lang sa “Visit Bohol 2015” aron madasig pa ang mga turista sa pagbisita dinhi sa lalawigan.
Link back to: Live Radio Recorded Broadcast Hot Topics
