Mga sam-ang sa lalawigan gisugdan na sa pagduaw sa mga tagtungod
Oct 30th, 2014 by Latest News
Nagsugod na sa pagdagsa sa mga sam-ang sa dakbayan ang mga katawhan aron moduaw sa ilang mga minahal sa kinabuhi nga nipanaw na sa laing kalibutan subay sa paghandum sa adlaw sa mga santos ug sa kalag-kalag.
Sa Victoria Memorial Park sa Brgy.Taloto, hipno na ang ipahigayon nga misa ugmang adlawa, Nob. 1 ang unang misa alas 7 sa buntag, alas 10 ang ikaduhang misa ug alas 3 sa hapon ang ikatulo.
Mopahigayon gihapon og misa ang United Church of Christ of the Philippines sa alas 8:30 hangtud na sa alas 9 sa buntag sa maong adlaw. Sa pagka-Nob. 2, adlaw sa mga kalag, susama gihapon ang skedyul sa misa alas 7, alas 10 sa buntag ug alas 3 sa hapon.
Sama sa ubang menteryo sa dakbayan, gidili gihapon sulod sa mga sam-ang ang pagdala sa mga ilimnong makahubog, karaoke, videoke, hait ug talinis nga mga hinagiban, armas, gidili usab ang pagsugal ug pagdala sa mga illegal nga drugas.
Adunay ipakatap nga mga pulis para sa seguridad, mga bombero ug paramedics para sa mga emerhensiya.
Link back to: Live Radio Recorded Broadcast Hot Topics