Hangtod karon wala pay tambal alang sa ebola virus DOH mipakatap sa inpormasyon
Nov 4th, 2014 by Latest News
Hangtud karon wa pay tambal o bakuna batok sa Ebola Virus maong gihingusgan sa Department of Health ang pagpakalap sa kasayuran aron makapangandam ug masayod ang mga katawhan kon ugaling makasulod dinhi sa nasud ang nahisgutang makamatay nga sakit ilabina nga dili kapugngan ang mga Pilipino nga dinhi sa Pilipinas gikan sa mga nasud sa West Africa, ang dapit nga daghang na-apektuhan ug nangamatay tungod sa maong sakit.
Mao kini ang pamahayag ni Dr. Expedito Medalla, ang Coordinator sa Health Emergency Management Staff sa Department of Health Region 7.
Matud ni Dr. Medalla nga bisag aduna nay pondo ang ahensiya para sa Personal Protective Equipment, kinahanglan gihapon nga mo-prodyus ang mga LGU sa PPE.
Hinuon gitataw sa DOH nga luwas pa gihapon karon ang Pilipinas sa Ebola maong wa gihapoy angay kabalak-an ang mga tawo apan kinahanglan nga mo-report gihapon sa mga tinogyanan ilabina sa panglawas kung adunay mamatikdang sintomas sa maong sakit sama sa hilanat, kalibanga aron mahatagan dayon og pagtagad.
Suma ni Medalla nga niabot na sa kapin 13 mil ang nataptan sa maong sakit diin dul-an sa 5 ka libo ang nangamatay gikan sa mga nasud sa Sierra Leone, Guniea ug Liberia diin niabot na sa 64 porsyento ang increase fatality rate niini.
Dugang usab ni Medalla nga aduna nay mga health workers sama sa doctor, Medical technologist ug nurse ang gibansay-bansay gani adunay gimugna ang kagamhanan nga Rapid Response Team nga mosuroy sa mga tambalanan aron mohimo sa pagpugong sa pagtakod kon ugaling mosulod sa nasud ang Ebola.
Link back to: Live Radio Recorded Broadcast Hot Topics
